एनपिएलमा जनकपुर बोल्ट्सको विजयी सुरुआत, विराटनगर ८ विकेटले पराजित
काठमाडौँ । नेपाल प्रिमियर लिग (एनपिएल) मा जनकपुर बोल्ट्सले विजयी सुरुआत गरेको छ ।
शनिवारदेखि सुरु भएको लिगको उद्घाटन खेलमा जनकपुर बोल्ट्सले विराटनगर किंग्सलाई ८ विकेटले हराउँदै विजयी सुरुआत गरेको हो । जनकपुरले निर्धारित ओभरको १५ दशमलव ३ बल खेल्दै जम्मा २ विकेटको क्षतिमा जित हात हासिल गर्यो ।
जनकपुरको जितका लागि लाहिरु मिलान्थाले नट आउट रहँदै सर्वाधिक ७५ रन जोडे भने हर्ष ठाकरले २९ रन बनाएका । त्यसअघि पहिला ब्याटिंग गर्न आएका मार्की आशिफ शेख शून्य र कप्तान अनिल कुमार साह ५ रनमा आउ भएका थिए । शेख क्रिस सोल र साह प्रतिश जिसीको बलमा आउट भएका थिए ।
त्यसअघि टस हारेर पहिला ब्याटिंग गर्न मैदान उत्रेको विराटनगरले निर्धारित ओभरको १९ ओभरमै अलआउट हुँदै १२७ रन बनायो । विराटनगरका लागि मार्टिन गप्टिलले अर्धशतक प्रहार गरेपनि अन्य खेलाडीले खासै रन जोडे्न सकेनन् ।
जनकपुरका लागि नेपाली स्पीनर ललित राजवंशीले उत्कृष्ट बलिङ गर्दै ४ ओभरमा २८ रन खर्चेर सर्वाधिक ३ विकेट लिए भने क्यानडियन अलराउण्डर हर्ष थाकरले ४ ओभरमा २२ रन खर्चेर २ विकेट लिए ।
